Тимот „CodeLeap“ е победник на локалното издание на 11. CASSINI Hackathon: Space for Water, што се одржа од 24 до 26 април во Скопје. Со проектот RedMetrics, тимот развива систем за детекција и предупредување на токсични алгални цветања (т.н. „црвени плими”) базиран на машинско учење, наменет за употреба во здравството и осигурителната индустрија.
RedMetrics го поврзува сателитското набљудување на океаните со респираторното здравје, адресирајќи го критичниот момент кога токсичното загадување на водата преминува во јавно-здравствена криза преку аеросолизација. Системот користи податоци од европските вселенски програми Copernicus Sentinel-3, C3S ERA5 и Copernicus Marine Service (CMEMS), комбинирани со приобални IoT сензори, за следење на алгалните цветања од длабоко море до брегот.
Клучна иновација на проектот е сопствениот Индекс за респираторен ризик (Respiratory Risk Index, RRI), што ги преведува еколошките сигнали во предиктивни медицински увиди, овозможувајќи приобалната инфраструктура да се подготви за зголемен број респираторни случаи пред првиот пациент да пристигне во ургентниот центар. Платформата обезбедува 72 часовно прогнозирање на катастрофи директно до софтвер за осигурување.
Проектот е развиен во рамки на тематската област „Следење и спречување на загадување на водите”.
Тимот победник освои награда од 3.000 евра обезбедена од G+D Netcetera, а в среда ќе ја претставува Македонија на натпреварувањето на европско ниво, каде десетте локални победници од десет земји ќе се натпреваруваат за главните награди: 5.000 евра за прво место, 3.000 евра за второ место и 1.000 евра за трето место, како и шест месеци менторство од врвни европски експерти во областа на вселенскиот бизнис.
CASSINI Hackathons е иницијатива на Европската комисија која обединува студенти, инженери, научници и претприемачи со цел развивање иновативни решенија базирани на податоци од европските вселенски програми Copernicus, Galileo и EGNOS.
Единаесеттото издание, посветено на предизвиците поврзани со водата, се одржа истовремено во десет европски локации.
