Во Собранието веќе е поднесен предлог-закон за измена на Законот за пратениците. И тука повторно ќе пукне уште еден меур од сапуница, оние списоци што ги објавуваа, па сега ги направија повторно многу актуелни со парламентарните избори во Бугарија, дека многумина од нашите пратеници, функционери, се со двојни државјанства – истакна Дафина Стојаноска, пратеничка од редовите на ВМРО-ДПМНЕ на гостување во емисијата на телевизија „Алфа“ .
Во соопштението од ВМРО-ДПМНЕ, пратеничката Стојаноска се осврна на предлог-законот за измена и дополнување на Законот за пратениците, кој веќе е поднесен во Собранието, и се предлага воведување услов – пратеник да може да биде само лице што има исклучиво македонско државјанство. Таа нагласи дека токму од страна на опозицискиот СДСМ биле неосновани обвинувањата дека одреден дел од пратениците се со двојно државјанство, а потписници на оваа измена, како што рече, се токму актуелни пратеници од пратеничката група на ВМРО-ДПМНЕ за кои СДСМ наведува дека се со бугарско државјанство и додаде дека денес ќе пукне уште еден меур од сапуница од страна на СДСМ.
– Потписници на оваа измена на Законот за пратениците се токму актуелни пратеници од оваа листа што ја вадат од СДСМ: Антонијо Милошоски, Никола Мицевски, Бојан Стојаноски, Игор Здравковски и Марија Петрушевска. Ако Антонијо Милошоски има бугарски пасош, дрско е тој да биде потписник. Предлогот е кандидатите за пратеници, кога ќе има следни избори, ако имаат двојно државјанство, да не може да станат пратеници. Да видиме како ќе се изјаснат колегите од СДСМ и затоа велам – денес ќе пукне уште еден меур од сапуница од страна на СДСМ. Денес ќе го имаат како предлог на самата седница кога ќе се усвојува дневниот ред за дополна бидејќи е по скратена постапка, не се работи за некоја сложена измена, и да видиме впрочем кој сѐ ќе гласа „за“, а кој блефира – децидна е пратеничката Стојаноска.
