Парламентарниот караван 2026 денеска тргна од штипскиот Правен факултет при Универзитетот „Гоце Делчев“. Пратениците во македонското Собрание имаа директна комуникација и дебатираа со студентите. Според деканката на правниот факултет, Билјана Тодорова, изборот на факултетот како домаќин претставува признание за улогата на академската заедница во поттикнување на младинско учество и развој на критичка мисла.
-Гости на факултетот се парламентарни представници, кои што пред студентите ќе го представат начинот на работење на Собранието и ќе се вклучат во директна дискусија со студентите, ќе одговараат на нивните прашања. Фактот што сме избрании како домаќин на овој настан е голема потврда за придонесот што го прави академската заедница кон поттикнување на младинското учество и креирање на критичка мисла кај младите-изјави Тодорова.
Пратеникот во македонското Собрание Душко Иванов изјави дека присутните активно дискутираа и предложија идеи за измени и дополнувања на одредени закони, што ја направи средбата успешна и продуктивна.
-Оваа година имаме отворени средби со студентите, мене ми е посебна чест дека почнуваме од Штип, почнуваме од Универзитетот „Гоце Делчев“, во организација на парламентарниот институт заедно со УГД, Правниот факултет, направивме една средба која што мислам дека помина добро, имаше интерес и од самите студенти и ги интересираше работата на законодавниот дом, начинот на постапката на нови закони, на измени и дополнувања на одредени закони, деловникот за работа во Собрание, како се работи во Собрание, имаше и идеи за некакви измени и дополнувања на некој закони. Така да можам да заклучам дека имавме една одлична средба со младите, со студентите-рече Иванов.
Пратеникот Благој Бочварски истакна дека ваквите средби со студенти и млади луѓе ќе продолжат во осум градови низ државата.
-Сметам дека Штип треба да биде лидер на ваков тип дискусии и дебати, кој што е политички, културен, но и историски центар на државата и ми беше драго што можев да споделам нови мислења со младите студенти. Имаше доста добри дискусии, разговаравме за студентското здружување, кое што тие го имаат за можностите, да можат што е можно повеќе општествено да се активираат и да го дадат својот максимум во тој дел, дали тоа ќе биде здружување во здруженија на граѓани во политички партии, во нивните студенстки здруженија, секако е важно за подобрување на целокупното општество-изјави Бочварски.
Студентите потенцираа дека ваквите средби придонесуваат за градење доверба и подобро разбирање на демократските процеси кај младите. Воедно беше истакнато дека ваквите иницијативи треба да станат редовна пракса со цел да се поттикне поголема граѓанска вклученост и одговорност.
