Општина Карпош, во соработка со Државниот завод за трансфузиологија и Општинска организација на Црвен Крст-Карпош, денеска ја спроведува редовната крводарителска акција, која во Карпош се одвива два пати годишно. Акцијата започна утрово во 9 часот, а веќе до 12 часот, дарувани се над 52 крвни единици, од страна на административните работници, граѓаните, вработените од приватните сектори, како и вработени во градинките и училиштата, информираат од Општината.
Градоначалникот на Општина Карпош, Сотир Лукровски ја поздравил оваа хумана акција и ги повикал сите искусни дарители да не ја испушат можноста повторно да даруваат, бидејќи капка крв значи живот.
-Одѕивот на граѓаните воопшто не е изненадувачки, бидејќи Општина Карпош е водечка општина по дарување крв. Крводарителските акции започнуваат од 2001 година, а посебно го поддржувам чекорот на младите кои се почесто се дарители. Дарувањето крв претставува чин на хуманост и грижа за другите. Како градоначалник секогаш ќе ги поддржувам иницијативите што ја поттикнуваат заедничката одговорност и ќе покажат дека сме дел од една заедница која помага кога е најпотребно. Би сакал да апелирам и да ги повикам сите граѓани да се приклучат кон денешната крводарителска акција и да дадат свој придонес, истакнал Лукровски.
Претставник од општинската организација Црвен крст, Билјана Костова додала дека долги години Црвениот крст соработува со Општина Карпош.
-Би сакала да напоменам дека правиме редовни традиционални крводарителски акции. Соработката со Карпош продолжува и особено ни е драго што имаме рекордни бројки во дарување крв, истакнала таа.
Од Општина велат дека Карпош е сеуште на врвот во најголем број собрани крвни единици, меѓу сите општини во државава. Во таа насока, Општина Карпош ги повикува сите граѓани, кои се во добра здравствена состојба да учествуваат во денешната крводарителска акција.
