Под наслов „Шокот на новото“, со учество на 1.200 говорници – 760 од Грција и 440 од странство, меѓу кои и министерката за енергетика, рударство и минерални суровини Сања Божиновска и заменик-министерот за надворешни работи и надворешна трговија Зоран Димитровски, со планирани над 200 дискусии, во грчкиот планински град со античко и историско значење Делфи од денеска до сабота се одржува 11-от Економски форум.
Форумот точно напладне свечено ќе го отворат претседателот на Грција Константинос Тасулас, претседателот на Естонија Алар Карис и принцот Алберт Втори од Монако, а на четиридневната конференција ќе учествуваат и претседателот на Европскиот совет Антонио Кошта, грчкиот премиер Кирјакос Мицотаки, премиерот на Албанија Еди Рама, европската обвинителка Лаура Ковеши, претставници на ЕУ, министри за надворешни работи, како и министри од грчката Влада.
На прес-конференцијата во Атина во средата, основачот и претседателот на Делфи форумот Симеон Цомокос и потпретседателот Јанис Томатис ги презентираа деталите за годишната конференција што ќе опфати пет тематски целини: геополитика и меѓународна безбедност; климатска криза и енергетика; одржлива економија и развој; технологија, како и луѓето и општеството.
Како и секоја година, така и сега, во фокусот ќе биде и Западен Балкан и проширувањето на Европската Унија со земјите од регионот, а денеска, на оваа тема ќе дискутираат шефот на грчката дипломатија Јоргос Герапетритис, заменик-министерот за надворешни работи и надворешна трговија Зоран Димитровски, министер за Европа и надворешни работи на Албанија Ферит Хоџа, првиот вицепремиер и министер за надворешни работи и дијаспора на Косово Глаук Коњуфца, министерот за европска интеграција на Србија Немања Старовиќ, заменик-министер за ЕУ на Црна Гора Иван Иванишевиќ и амбасадорот на Босна и Херцеговина во Грција Драган Вуковиќ.
Енергетиката е уште една од темите кои се нераскинлив дел од форумот во последните години, а на една од панел-дискусиите, утре претпладне ќе учествува министерката за енергетика, рударство и минерални суровини Сања Божиновска за едно со министерот за енергетика на Бугарија Трајчо Траиков, специјалниот пратеник за енергетска интеграција од Министерство за енергетика на САД Џошуа Волц, претседателот и извршен директор на групацијата „Aktor“ и извршен директор, „Atlantic SEE LNG Trade“ Александрос Ексарху.
-Форумот ќе се фокусира на клучните области: од геополитиката на енергијата и создавањето нови преносни мрежи, до зајакнувањето на меѓусебното поврзување во Југоисточна Европа. Посебен акцент ќе биде ставен на градење отпорни енергетски системи кои обезбедуваат стабилност против идните предизвици и кризи, соопштија организаторите во однос на темите поврзани со енергетиката.
Годинешната организација со главен наслов „Шокот на новото“ („The Shock of the New“) ја става во фокус новата реалност што се обликува од брзите промени во последните години: од воените конфликти во Иран и Украина и новите геополитички рамнотежи што се формираат, до енергетските предизвици и длабоките промени што во економијата, бизнисите и општеството ги носи продорот на вештачката интелигенција.
Делфи економскиот форум е независна, непрофитна организација со меѓународен карактер, каде секоја година се среќаваат престижни личности од економијата, политиката и академската заедница, а целта е да се прикаже реална рамка на цели и активности, да се бараат политики за справување со глобалните предизвици и да се најдат соодветни решенија за сложените прашања, како и да се промовираат иновативни идеи за одржлив и конкурентен раст за Европа и поширокиот регион на Источен Медитеран.
