Американскиот претседател Доналд Трамп и рускиот претседател Владимир Путин одржаа телефонски разговор, кој траеше еден час, информираше советникот на рускиот претседател за надворешна политика, Јуриј Ушаков.
Главна тема на разговорот била ситуацијата во Украина, а Ушаков го опиша разговорот како „конструктивен и многу искрен“. Двајцата лидери се осврнаа и на неодамнешната посета на претставниците на Трамп – Стив Виткоф и Џаред Кушнер – на Москва, а потоа и на Киев, како дел од новата дипломатска иницијатива на Вашингтон за мировни разговори и крај на војната во Украина.
Според советникот на Путин, за време на разговорот Трамп јасно се залагал за брз крај на војната, што веднаш би отворило перспективи за целосно обновување на односите меѓу САД и Русија.
Од друга страна, Путин му го претстави на американскиот претседател руското гледање на ситуацијата, вклучително и напредувањето на руските сили на бојното поле и постигнувањето на поставените цели во Украина, рече Ушаков.
Според неговите зборови, рускиот претседател го уверил Трамп дека Русија нема агресивни намери кон Европа.
