Институтот за национална историја – Скопје, во соработка со Фондацијата Конрад Аденауер, денеска во Порта Македонија организираат панел-дискусија на тема „Моментот на основање на Европа: Зошто беше основана Европската Унија и што таа значи денес“, како дел од серијата „Дијалог за историја и стратегија“.
Серијата „Дијалог за историја и стратегија“ има за цел да отвори критичка и структурирана дискусија за врската помеѓу клучните историски настани и нивното влијание врз денешната стратешка и безбедносна средина.
Првата сесија ќе се фокусира на причините за создавањето на Европската Унија, лекциите научени од европската историја и нивната релевантност во сегашниот контекст на зголемени геополитички тензии.
Воведни обраќања, според најавата од организиторите, ќе имаат претседателката Гордана Силјановска-Давкова, директорот на Институтот за национална историја, проф. д-р Митко Панов, раководителот на канцеларијата на Фондацијата Конрад Аденауер (КАС) за Македонија и Косово, Даниел Браун, амбасадор на Италија, Паоло Палминтери и амбасадорот на Кралството Шпанија, Рафаел Соријано Ортиз.
Дискусијата ќе опфати неколку клучни прашања релевантни за разбирање на современите европски и глобални случувања: историските темели на Европската Унија и нејзината оригинална стратешка цел, улогата на историјата во обликувањето на денешната европска безбедносна архитектура, предизвиците со кои се соочува ЕУ во средина на зголемена геополитичка конкуренција, лекции од минатото и нивна примена во спречувањето на идните конфликти, како и позицијата на малите држави во современиот европски и светски поредок.
