Изградбата на новата детска градинка во населбата Дексион во Ѓорче Петров се одвива со засилена динамика, информираат од Општина Ѓорче Петров, се вели во соопштението од Општина Ѓорче Петров.
Како што соопшти градоначалникот Александар Стојкоски, станува збор за значаен инфраструктурен зафат во областа на предучилишната заштита, чија цел е обезбедување современи и безбедни услови за згрижување на децата.
„Новата градинка не е само објект, туку инвестиција во иднината. Со нејзината изградба создаваме простор кој ќе одговори на потребите на семејствата од овој дел на општината, со фокус на безбедност, енергетска ефикасност и квалитетни услови за престој и развој на најмладите“, изјави Стојкоски.
Од Општината посочуваат дека објектот ќе биде изграден согласно современи стандарди, со функционални и модерно опремени простории, како и со уреден дворен простор што ќе овозможи безбедна игра и престој на отворено.
Со реализацијата на овој проект, локалната самоуправа продолжува со вложувања во образовната и социјалната инфраструктура, со што, како што наведуваат, се одговара на реалните потреби на граѓаните и се создаваат предуслови за поквалитетен живот во општината.
Проектот е дел од пошироките напори на Општина Ѓорче Петров за унапредување на условите за децата и младите, со јасна насоченост кон долгорочен и одржлив развој.
