Набргу на Влада треба да помине проект за изградба на центар за хронични рани и гангрени – најави директорката на Геријатрија, Ленче Нелоска.
Таа вели дека се среќни што, како што истакна, еден стар проект, кој бил замрзнат, повторно е актуелен.
– Очекуваме набргу да помине на Влада изградба на центар за хронични рани и гангрени. Со изградба на ваков објект, кој треба да биде овде (кај што се овие стари бараки), објект на приземје и два ката… На приземјето планирани се 18 амбуланти, во кои ќе бидат застапени сите наши дејности и методи и консултативни амбуланти. На вториот кат планирани се 80-ина геријатриски кревети, со што ќе се зголеми капацитетот (значи, тоа е нешто најбрзо што може да биде да кажам). А на вториот кат ќе има уште 20-ина геријатриски кревети, меѓутоа планирана е и операциона сала со четири кревети за интензивна и 12 кревети за постинтензивна нега за пациенти со гангрена – појасни таа.
Со тоа, истакна, ќе се реши проблемот во земјава со пациентите со гангрена.
-Сите хируршки одделенија низ Македонија ќе бидат ослободени од пациенти со гангрена, затоа што знаеме – ако се влезе со гангрена во сала, тогаш два дена таа сала мора да се исфрли од употреба, да се исчисти, за да дојде следен пациент. Е сега, откако ќе се направи овој центар, пошто гангрената е елективна проблематика, ќе може да се договара сето тоа, сите пациенти да добијат благовремено услуга, а за сметка на тоа, останатите сите хируршки болници низ Македонија ќе можат рутински да си ја работат онаа работа којашто им е предвидена- подвлече таа.
Додаде дека се надева оти следната средба овде ќе биде на поставување камен-темелник за изградба на Центарот.
