По повод Светкиот ден на книгата и авторското право – 23 Април, во библиотеката “Кочо Рацин” при Национална установа Центар за култура Крива Паланка, денеска беа наградени најредовните читатели. Дипломи и книги, како симболична награда, од директорот на НУЦК Крива Паланка, Сашко Додевски им беа врачени на најмладите читател и читателка, како и на тројца читатели од возрасна категорија.
-По повод Светскиот ден на книгата и авторското право бибкиотеката при НУ Центар за култура Крива Паланка за своите редовни читатели во две категории: најмлади читатели и редовни возрасни читатели им подари благодарници и книги, со цел да им даде признание на истите, но и поттик на останатите читатели. Библиотеката редовно го збогатува книжниот фонд со најнова белетристика, книги за помлада возраст и лектирни изданија, а слободно може да истакнам дека интересот за изнајмување книги постојано расте, информира Даниела Петровска, координатор на библиотеката.
Младите поетеси, Лара Стевановска и Глорија Стојмировска од основно училиште “Св.Јоаким Крчовски ” и средното општинско училиште “Ѓорче Петров” од Крива Паланка, во соработка со НУЦК Крива Паланка, под менторство на професорките Јасна Ѓоргиевска и Даниела Стојмировска, утре ќе учествуваат на годинешниот поетски настан “Пролет, љубов, смеа” во Домот на културата “Крсте Мисирков”, во Свети Николе.
-До крајот на месецот нѐ очекува и организација на општинскиот натпревар “Млади библиотекари” што ќе се одржи на 29 април во библиотеката, а ученикот што ќе освои прво место ќе се натпреварува на Републичкиот натпревар за млади библиотекари на 15 мај во Домот на култура “Горјан Тозија” во Ресен, информира Петровска.
Конкурсот го распишува библиотекарското друштво на Македонија, а учествуваат сите библиотеки членки на здружението.
