Владата ќе ги заштити граѓаните од ценовен шок на горивата. Премиерот Мицкоски вели дека се чека одлуката за новите цени во понеделник на Регулаторната комисија за енергетика, за да се реагира. Планот е веќе следниот ден, во вторник, на владина седница да се донесат неопходните одлуки. Опциите вклучуваат намалување на ДДВ и акцизите кај нафтените деривати и активирање на нафтените резерви. Мицкоски вели дека складиштата се полни и Македонија има резерви на деривати кои може да ги користи над 62 дена во услови на недостиг на пазарот.
„Доколку има драматичен скок на цената на нафтата и нафтените деривати, Владата веднаш, уште во вторник, на редовна седница, ќе интервенира. Имаме неколку опции – дали ќе намалиме акциза или ДДВ, ние апсоултно ќе застанеме во одбрана на она што е наш интерес, а тоа е стандардот на граѓаните“ – изјави Мицкоски.
Во последните неколку дена некои бензински пумпи не точеа горива по 22 часот или пак ја ограничуваа количината што може да се купи. Премиерот Мицкоски е запознаен со проблемот и вели дека секое девијантно однесување ќе биде санкционирано и дека инспекциите постојано ќе бидат на терен. Според него, добро е тоа што во моментов Македонија има меѓу најевтините горива на Балканот и во Европа, но и дека ако трговците и маркетите ја искористат оваа ситуација да ги покачат цените на производите ќе бидат казнети и ќе плаќаат казни.
„Граѓаните треба да бидат спокојни, кај нас цената е драматично пониска од онаа во соседството. Ако литар во Србија е 120 денари, кај нас е 70, исто е ако споредиме и со Косово, Албанија. Уште еднаш како Влада покажуваме дека стандардот на граѓаните ни е пред се. Ние алатките што ги имаме преку ДПИ и Комисијата за заштита на конкуренцијата ќе ги искористиме сите, го менуваме и законот, ги зголемуваме глобите за 10 – 20-кратно“ – вели Христијан Мицкоски – претседател на Влада.
Нафтата од типот брент поскапе за неверојатни 27% последнава недела од 72 на 93 долари за барел. Владата будно ја следи состојбата и не исклучува ниту пораст на инфлацијата ако кризата на Блискиот Исток потрае. Мицкоски вели дека ако има потреба, ќе се интервенира со мерки и решенија за заштита на животниот стандард. Меѓународниот монетарен фонд веќе пресмета дека секое поскапување на нафтата од 10% ја крева инфлацијата за 40 базични поени и го намалува економскиот раст за 0,2%.
