Српската полиција денеска ја затвори улицата пред Републичката изборна комисија наспроти која се наоѓа и Претседателството.
За сообраќај, но и за пешаци, е затворен дел од булеварот од крстосницата кај локацијата позната како „Лондон“ кон Теразије, а трасите на јавниот превоз се изменети на потегот од Славија кон Теразије.
Бариери се поставени кај „Лондон“ и на Теразије, а во тој дел има и зголемено присуство на полиција.
Засега нема официјални информации зошто овој не мал дел од центарот на Белград е затворен уште од сега и до кога ќе биде непрооден. Во разговор со српските колеги дознаваме дека ни тие не знаат зошто е затворено, ниту имаа дозвола од Теразије да преминат од другата страна кон Славија. Тоа значи дека доколку некој од Теразије сега сака да стигне до Славија, ќе мора да заобиколи голема област.
Неколу метри подолу, на Кнез Михајлова, секојдневието е најнормално, со многу туристи и безгрижни белграѓани кои го пијат своето пладневно кафе и сакаат да изгледаат незаинтересирано. јт/ссм
