Учесниците на панелот „Дигитализација и модернизација – паметни економии, посилен регион“, што се одржа во рамките на годишната конференција „Западен Балкан 2030“ во Белград, денеска оценија дека дигитализацијата е клучот за соработка во регионот и за нејзината одржливост.
Вицепремиерот на Македонија, Иван Стоилковиќ, нагласи дека не е доволно да се зборува за дигитализацијата како за добра вест, туку дека за нејзино квалитетно користење е потребно инвестирање во образованието.
Стоилковиќ оцени дека дигитализацијата е „на некој начин освојување на нова слобода“, но дека основниот проблем е образованието, додека ширењето на дигитализацијата е друг проблем.
Според Стоилковиќ, ако земјите од регионот не можат да ја шират дигитализацијата кај своето пошироко население, тешко дека можат да постигнат меѓусебна соработка на пошироко ниво во дигиталната сфера.
Амбасадорот на Финска во Србија, Црна Гора и Македонија, Никлас Линдквист, изјави дека дигиталната стратегија на неговата земја се базира на помагање на корисниците и силна заштита на информациските системи, а дека вештачката интелигенција е во преден план.
Тој истакна дека не е доволно само владата на една земја да сака да биде дигитална, туку и граѓаните мора да го сакаат тоа.
