Дојран се подготвува да ги пречека првите туристи и викенд посетители за Велигден. Општинските власти спроведоа повеќе активности за уредување на зелените површини, искосен е паркот во централното подрачје, уреден е пристапот до старата црква „Св. Илија”, а се коси и зелениот појас по должината на регионалниот пат од Стар до Нов Дојран.
Надлежните велат дека подготовките за пролетниот старт на туристичката сезона во Дојран ги започнале уште кон крајот на минатата година, кога се спроведе чистење на езерското крајбрежје со цел да се овозможи понатамошно уредување и подобрување на просторот.
– Тековно се уредуваа сите зелени површини во централното подрачје на Дојран, пешачката патека покрај брегот на езерото, градскиот парк, а се уредија и површините околу верските објекти во Стар Дојран, манастирот „Св. Марија Магдалена” и црквата „Св. Илија”, велат од Општина Дојран.
Издавачите на сместувачки капацитети велат дека има интерес за посета на туристи во овој период од годината.
– Aпартманите веќе ги нудиме за издавање бидејќи имаме најава дека за Велигден ќе дојдат заинтересирани туристи кои сакаат тука да ги поминат слободните денови од петок до недела. Го избираат Дојран, затоа што е мирно туристичко место, со преубава природа и најмногу поради чистиот воздух, вели издавач на сместувачки објект од Стар Дојран.
Од Општината информираат дека носител на сите активности за уредување на зеленилото во Дојран е комуналното претпријатие „Полин”, а учествувале и лицата осуденици што издржуваат казни во затворите во Гевгелија и Струмица, како дел од вршењето општокорисна работа, согласно меморандумот за соработка склучен меѓу Општина Дојран и двете казнено поправни установи.
Во соработка со Доброволното противпожарно друштво од Дојран за денес е најавено миење на патеката на шеталиштето и скалите кои водат до црквата „Св. Илија”.
