Центарот за климатски промени започна со проширување на мрежата за примарна селекција на отпад во Општина Гази Баба, со цел поддршка на локалните самоуправи во исполнување на Зелената агенда за Западен Балкан.
Како што соопшти Центарот, на 24 април годинава во населeното место Даме Груев – Трубарево беа бесплатно доделени 95 канти за примарна селекција на пластичен отпад на домаќинствата. Активноста претставува почетна фаза од поширока иницијатива, при што во наредниот период се планира зголемување на бројот на канти со цел да се опфатат што поголем број домаќинства.
Од Центарот посочуваат дека примарната селекција е клучен предуслов за ефикасно и одржливо управување со отпадот и значајно намалување на мешаниот комунален отпад што завршува на депониите. Истовремено, се апелира до граѓаните доследно да се придржуваат до утврдените правила за селекција и активно да придонесуваат кон зголемување на количината на селектиран отпад.
Активноста се реализира во рамките на проектот „Младите и жените – двигатели на транзицијата кон одржливо управување со отпадот во руралните средини“ (WeLEADRural), преку кој се набавени 60 жолти канти со капацитет од 120 литри за пластичен отпад. Проектот е дел од програмата BOOST Balkans, со поддршка од ALDA – European Association for Local Democracy, ALDA Balkans и AFD – Agence Française de Développement.
Набавените канти се донирани на Општина Гази Баба, која, покрај тоа, ги стави во употреба и кантите обезбедени од Министерството за животна средина и просторно планирање, со што се зајакнува локалната инфраструктура за управување со отпад. Собирањето на пластичниот отпад ќе се реализира во соработка со Алпак Еко, колективен постапувач за отпад од пакување.
Од Центарот за климатски промени информираат дека во наредниот период вакви системи за примарна селекција ќе бидат воспоставени и во општините Ѓорче Петров и Илинден, како и дека слични активности веќе се реализирани во село Стајковци, Тетово и Општина Аеродром, во рамки на проект поддржан од Владата на Швајцарија преку програмата Цивика мобилитас.
Со иницијативата, како што се наведува, се поставуваат основи за модерен, одржлив и ефикасен систем за селекција на отпад директно од изворот, што претставува значаен придонес кон намалување на отпадот и поттикнување на принципите на циркуларната економија.
