Европската комисија започна интензивни разговори со новото унгарско раководство, испраќајќи јасна порака дека очекува брзо подобрување на односите со Украина и спроведување реформи за деблокирање на околу 35 милијарди евра европски средства.
Во Европската комисија, победата на Маѓар се толкува како силен мандат за длабоки промени, но и како причина за зголемени очекувања од новата власт. Според европски дипломати, меѓу првите тестови за Маѓар ќе биде деблокирањето на заемот на ЕУ за Украина во вредност од 90 милијарди евра, како и повлекување на унгарското вето за нов пакет санкции кон Русија.
Дополнителен притисок врз Будимпешта создава и спорот околу миграциската политика. Поради одбивањето да се спроведе пресуда на Европскиот суд на правдата, Унгарија плаќа казна од еден милион евра дневно.
