Потпретседателот и портпарол на Демократската унија за интеграција која е дел од Националната алијанса за интеграција, Арбер Адеми на вечерашната прес-конференција по завршување на гласањето изрази благодарност до сите граѓани кои денеска го искористиле своето демократско право на глас со одговорност и достоинство.
Според Адеми, овие избори беа тест на политичкиот и моралниот карактер на државата.
-Овие избори беа повеќе од локална трка. Тие беа тест на политичкиот и моралниот карактер на државата. Успешно се соочивме со нечесна и незаконска кампања, која го оцрни процесот и ја наруши еднаквоста на изборниот процес. Сведоци сме на масовно купување гласови, изборен асфалт, ноќно бетонирање, злоупотреба на јавните ресурси и брутална вмешаност на државниот апарат во корист на власта. Сепак, и покрај сите овие злоупотреби, граѓаните покажаа дека знаат да препознаат и не дозволија овие темни методи да го искриват резултатот во првиот круг. Затоа, сме убедени дека нема да успеат да го искриват ниту сега во вториот круг. Нашата доверба е во граѓанинот, во силата на слободниот глас и во достоинството на човекот кој не се продава за реки цемент, набрзина асфалтиран пат или привремен договор, рече тој.
Во оваа чувствителна фаза на процесот, нагласи Адеми, упатуваме директен повик до секој член на изборната комисија, секој набљудувач и до секоја надлежна институција со чесност и со висока професионалност, одговорност да ја гарантираат слободната волја на граѓаните и интегритетот на изборниот процес.
-Секој глас е свет и секое вмешаување е мешање во иднината на државата. НАИ останува цврсто посветена на патот на промените, на граѓанското достоинство и на создавање општество во кое власта се добива со доверба, а не со притисок. Нашиот пат е јасен – патот на демократијата, еднаквоста и европската интеграција. Ние ќе го браниме тој пат со решителност, со спокој и со достоинство, истакна Адеми.
