Наместо со упати за конкретни специјалности, пациентите од Истокот прво ќе бидат прегледувани во Ургентен центар во Штип. Целосната реконструкција на просториите во кои ќе функционира оваа служба е речиси завршена, по што ќе следува опремување со инвентар и пуштање во употреба. Планирано е да работат специјализанти кои ќе бидат под надзор на специјалисти со долгогодишно искуство.
„90% од Ургентниот центар веќе се направени. Има уште некои ситни работи што треба да се средат, а потоа ќе почнеме со опремување со мебел, кревети и инвентар. Организациски веќе правиме планови за персоналот што ќе работи долу“, изјави директорот на штипската Клиничка болница, д-р Владко Захариев.
Центарот ќе овозможи побрзо згрижување, бидејќи нема да се губи време во барање соодветен специјалист, особено кога станува збор за критични пациенти од другите градови во регионот. Овде ќе се вршат првичните прегледи, по што ќе се проценува на кое одделение да продолжи лекувањето, бидејќи одредени служби не работат 24 часа на ден.
„Целта ни е кога ќе се формира Ургентниот центар да биде влезната врата во болницата. Планираме тие приоритетни упати да ги блокираме и влез ќе биде Ургентниот центар. Тоа значи некој што има проблем во Берово или Пехчево со упат, тријажата ние ќе ја направиме, бидејќи ние во моментот имаме увид кој специјалист е на работа и кој треба да се повика. Протоколите сами ќе си ги правиме“, изјави директорот на болницата во Штип, д-р Захариев.
Отворањето на Ургентниот центар е долгогодишна идеја која не можеше да се реализира поради недостиг од кадар и простор. Со пренамена на модуларната болница во специјалистички амбуланти се создадоа услови за новата служба. Инаку, штипската Клиничка болница има највисок индекс на сложеност на случаи во споредба со клиничките болници во Тетово и Битола, а отворањето на новиот центар дополнително треба да ја унапреди здравствената заштита на околу 150.000 жители во регионот.
