Библиотека „Кочо Рацин“ – Тетово денеска го реализираше културно-едукативниот проект „Кажи ми како се прават работите без телефон?“, со цел да се обработи еден од најчувствителните предизвици на современото време – влијанието на технологијата и зависноста од телефоните кај децата и младите.
Оваа иницијатива е насочена за подигнување на свеста за враќање на човечката комуникација, културата на читање, креативноста и здравите социјални односи, во време кога неконтролираната употреба на технологијата сè повеќе влијае врз емоционалниот, психолошкиот и интелектуалниот развој на младите генерации.
-Активноста се реализираше во интерактивна и директна форма, каде што учениците имаа активна улога преку поставување прашања, изразување ставови и влегување во дијалог со панелистите. Овој пристап придонесе дискусијата да биде динамична, автентична и блиска до реалните искуства на децата, претворајќи ја активноста во вистински образовен и рефлексивен процес, соопштија од Библиотеката.
Во своето обраќање директорот на библиотеката Бинас Пајазити ја истакнал улогата на културните и образовните институции во формирањето на младите генерации и важноста од нивно насочување кон знаењето, книгата и директната човечка комуникација.
Во овој интерактивен разговор учествувале професионалци и едукатори од различни области: д-р Ремзије Луши, д-р Мимоза Жаку, психолозите Билјана Радичевска и Арифе Амети, како и наставничката по ликовна уметност Ивана Настески. Посебен придонес дадоа и наставничките Фиторе Хајрули, Хавуше Реџепи и Снежана Николоска.
-Преку овој проект беше пренесена пораката дека технологијата треба да остане средство во служба на човекот, а не замена за комуникацијата, образованието и реалниот живот. Во суштина, активноста ја потсети јавноста на важноста на книгата, семејството, училиштето, уметноста и дијалогот како темелни столбови за формирање на посвесна, похумана и општествено одговорна генерација, соопштија од библиотеката „Кочо Рацин“.
Во проектот учествуваа учениците од ОOУ „Гоце Делчев“, ОOУ „Лирија“ и ОOУ „Абдил Фрашери“.
