Крива Паланка уште еднаш покажа дека знае, може и сака да ја чува природата. Со искрена желба за почист, поздрав и позелен град, стотици граѓани, институции, здруженија, волонтери и јавни служби денес се обединија околу една заедничка цел создавање подобри услови за живот и зачувување на природните вредности за идните генерации, преку реализацијата на шестата по ред национална еколошка акција „Генералка Викенд“, информира службата за комуникација со јавност на Општина Крива Паланка.
Во акцијата активно учествуваа околу 400 учесници кои реализираа активности за чистење на 30-тина локации на територијата на општината, опфаќајќи: јавни и неуредени површини, излезни патишта од градот, речни корита, спортско-рекреативни центри, излетнички места и други јавни простори.
-Резултатите од акцијата се силен показател за колективната еколошка свест и посветеност,собрани се вкупно 153 вреќи разновиден отпад и 35 вреќи селектиран отпад. Покрај теренските активности, во општинските училишта беше реализиран и специјален еко-час, преку кој учениците имаа можност практично да се вклучат во еколошки активности и селекција на отпад, развивајќи свест за значењето на заштитата на природата уште од најрана возраст, додаваат од општината.
Градоначалникот Сашко Митовски истакна дека ваквите акции се доказ дека заедништвото и љубовта кон градот носат вистински промени:
-Кога постои воља, организација и искрена грижа за местото во кое живееме, резултатите секогаш се видливи. Чиста и уредена Крива Паланка не е обврска само на институциите, туку заедничка одговорност на сите нас. Благодарност до секој граѓанин, волонтер и институција што денес даде личен придонес за поубава, поздрава и позелена Крива Паланка, рече Митовски, посочувајќи дека оваа масовна еколошка акција уште еднаш потврди дека кога сме обединети околу вистински вредности, можеме да создадеме почиста, поуредена и похумана средина за живот.
Во реализацијата на акцијата учествуваа: Локалната самоуправа, ЈП Комуналец, Црвен крст, Детската градинка „Детелинка“, ООУ „Илинден“, ООУ „Јоаким Крчовски“, СОУ „Ѓорче Петров“, Дом на култура, ТППЕ, Спасителна служба „Спасител“, Извиднички одред „Наум Наумовски Борче“, Центар за активно стареење и бројни други поддржувачи и граѓани, а од општината упатија благодарност до сите учесници, волонтери, институции и граѓани кои со својот труд, енергија и личен пример придонесоа акцијата да биде успешна.
