Здружение на пензионери Куманово годинава со низа активности го одбележува значајниот јубилеј – 80 години од своето постоење. Наместо традиционални свечени седници, раководството се одлучило за динамична програма што опфаќа фестивали, регионални средби и културно-спортски манифестации со учество на пензионери од земјава и регионот.
Во рамки на јубилејната програма, денеска во големата сала на Центар за култура „Трајко Прокопиев“ се одржува меѓународен фолклорен фестивал. Од здружението информираат дека активностите започнале уште во април со културен настан, а ќе продолжат и во наредните месеци.
Во рамки на јубилејната програма, во јуни ќе се одржи фестивал на хорови и пејачки групи, а Куманово годинава ќе биде домаќин и на регионалните спортски игри за пензионери од североисточниот регион.
-Здружението на пензионери од Куманово, едно од најстарите во државата, е формирано веднаш по Втората светска војна од ентузијасти и занаетчии, а со текот на времето прераснало во значајна организација која ги обединува пензионерите од градот. Во својата историја поминало низ повеќе развојни фази, вклучително и период кога ги опфаќало и пензионерите од Крива Паланка и Кратово, пред тие да формираат сопствени здруженија. Сега сме едни од најбројните во државата-изјави претседателот на здружението, Ристо Бошков.
Во рамки на меѓународната соработка, претставници на здружението годинава ќе учествуваат и на фестивал за пензионери во Љубљана, каде ќе ја претставуваат Македонија. Бошков информираше дека здружението годишно издвојува меѓу пет и осум милиони денари за хуманитарни и социјални цели, најчесто како помош за болничко лекување и бањска рехабилитација на пензионерите.
– Не станува збор за директно делење готови пари, туку за враќање дел од трошоците врз основа на медицинска документација и одлука на комисија. Сите средства се исплаќаат преку законски утврдена постапка-посочи Бошков.
Здружението во моментов има околу 16.700 пензионери.
