Општина Виница ги отстрани времените објекти – бараки на улицата Илинденска, кои со години биле нефункционални и претставувале несоодветна слика за овој дел од градот.
По нивното отстранување, започнати се активности за уредување на просторот и создавање дополнителни паркинг места, со цел подобрување на инфраструктурата и условите за граѓаните.
Од Општина Виница информираат дека новите паркинг капацитети ќе имаат особено значење со претстојното отворање на затворениот градски пазар, проект на кој интензивно се работело во изминатите шест месеци.
Се очекува пазарот наскоро да биде ставен во функција, а новообезбедените паркинг места да им олеснат на граѓаните при неговата посета.
Проектот е дел од пошироките напори на локалната самоуправа за подобрување на урбаното уредување и квалитетот на живот во Виница.
