Регионална министерска конференција на тема „Предводење на промените: Патеки кон демографска отпорност согласно потребите на луѓето“ ќе се одржи денеска и утре во Скопје, во организација на Министерството за социјална политика, демографија и млади во партнерство со Фондот за население на Обединетите нации (УНФПА).
Конференцијата ќе ја отвори премиерот Христијан Мицкоски, кој е покровител на овој настан, во тек на кој ќе се одржат седум панел сесии со учество на министри, заменици-министри и претставници на меѓународни организации.
На отворањето ќе се обратат и министрите за социјална политика, демографија и млади, Фатмир Лимани и за надворешни работи и надворешна трговија, Тимчо Муцунски, како и Пио Смит, помошник генерален секретар и заменик извршен директор во УНФПА и Ален Берсе, генерален секретар на Советот на Европа.
На првиот ден од конференцијата ќе се дебатира на панел сесиите: „Демографски трендови и јавни политики: Од предизвик до отпорност“, „Оспособување на луѓето: Човечки капитал, политики ориентирани кон семејството, здраво и активно стареење“, „Поддршка на луѓето во транзиција: Пазар на трудот, социјална заштита, политики за миграција и дијаспора“ и „Меѓународна и регионална соработка за демографска отпорност“.
Вториот ден конференцијата ќе ја отвори претседателот на Собранието Африм Гаши, а предвидени се три тематски панел дискусии.
