По повод 5 Мај – Денот на македонскиот јазик Македонско друштво „Илинден“-Тирана упати честитка до сите Македонци каде и да се.
-Негувањето на мајчиниот македонски јазик значи јакнење и зачувување на националниот и културен идентитет, со што нашите деца ќе бидат воспитани соодветно да ги негуваат своите национални културни и верски традиции. Образованието на мајчин македонски јазик е најважниот сегмент во негувањето на основните обележја на еден народ, стои во честитката.
Се додава дека Македонците во Албанија ги има во четири етнички области: Голо Брдо, Преспа, Гора, Врбник, како и во најголемите градови – Тирана, Елбасан, Драч, Каваја, Корча, Билишта, Подградец, Скадар, Кукс, Берат, Либражд, Валона, Фиер, Патос.
Бројноста на Македонците во Република Албанија е над 120 илјади, според процена на македонските организации, но, за жал во 21 век само во Преспа имаат право на образование на мајчин македонски јазик.
-Македонското друштво „Илинден“-Тирана од 2009 година бара образование на мајчин македонски јазик за децата во Голо Брдо, каде настава на македонски, имало до 1950 годинa, потоа во Гора, како и во другите делови каде концентрацијата на Македонците е поголема, но нема позитивен одговор, се нагласува во честитката потпишана од Никола Ѓурѓај, претседател на друштвото.
