Полицијата го расветли случајот со инцидентот со синагогата во Скопје. Уапсени се седуммина за палањето на еврејскиот објект. Двајца ќе се гонат за тероризам, и тие веќе се во притвор. Преземени биле повеќе оперативно –тактички мерки од Секторот за борба против тероризам, насилен екстремизам и радикализам и Агенцијата за национална безбедност, а претреси имало на 13 локации во Скопје, а биле одземени мобилни телефони за вештачење.
- „Поднесена кривична пријава против А.Љ (21) од Скопје поради основи на сомневање за сторено кривично дело „тероризам“ по член 394-б и А.Р. (38) од Скопје поради основи на сомневање за сторено кривично дело „тероризам“ по член 394-б од КЗ во врска со член 24 од КЗ, а од страна на судија на претходна постапка одредена им е мерка притвор“ изјави Гоце Андреевски – Портпарол на МВР.
По инцидентот на 12 април во раните утрински часови осуди и барање за брзо расветлување на случајот пристигнаа од сите страни. Тоа го побара и израелската амбасадорка во Скопје, Вивиен Аисен.
Верските лидери во Македонија оддржаа и заедничка прес-конференција и го оценија настанот како директен удар врз мирот, стабилноста и соживотот кои со векови се негуваат на македонска почва.
