Доживотен затвор за таканаречениот „касап од Штип“. Основниот суд во Штип го прогласи за виновен 75-годишниот Денис Асанов за бруталното убиство на 79-годишната Борјанка Николова.
Убиството, поради својата бруталност и начинот на извршување, предизвика големо внимание во јавноста, а во текот на целата судска постапка Асанов не призна вина. Тој тврдеше дека ја пронашол жртвата мртва во неговиот дом, по што тројца мажи, меѓу кои го препознал и својот очув, ја закопале во неговиот двор, заканувајќи му се по неговиот живот, поради што молчел.
Според обвинението, кое заврши и со пресуда, убиството се случило во периодот од 6 октомври до 10 ноември минатата година, во домот на обвинетиот. При извршување на убиството, жртвата била нападната со тврд предмет и биле нанесени повеќе удари во пределот на градниот кош, при што биле скршени осум ребра. Потоа ги пресекол екстремитетите и го обезглавил телото. Трупот го закопал во дворот од својот дом, а деловите што недостигаат сè уште не се пронајдени.
