Пратеникот Илир Демири учествува на дводневната седница на Комисијата за социјален развој, образование, истражување и наука на Парламентарното собрание на Процесот за соработка на Југоисточна Европа (ПС на ПСЈИЕ), во Анкара. Главна тема за дискусија на седницата е: „Употребата на вештачката интелигенција во образованието“.
Седницата била отворена со поздравен говор на претседателот на Комисијата, Рефик Озен, по што следело обраќање на заменик министерот за образование на Република Туркије, Билал Маџит.
Како што се посочува во соопштението од Собранието, на седницата биле презентирани предлог-извештајот и предлог-резолуцијата за употребата на вештачката интелигенција во образованието, по што се следела дискусија во која пратениците од парламентите учеснички во ПСЈИЕ ги презентирале своите ставови и искуства на овој план.
Во своето обраќање, пратеникот Илир Демири истакнал дека вештачката интелигенција веќе е присутна во образовниот процес и претставува значаен потенцијал за подобрување на квалитетот, инклузивноста и достапноста на образованието. Тој нагласил дека Македонија ја препознава дигиталната трансформација како стратешки приоритет, при што вештачката интелигенција е интегрирана во рамките на националните политики, особено преку стратегијата SMART/MK 2030.
Демири посочил дека воведувањето на вештачката интелигенција во образованието се спроведува постепено, со посебен фокус на средното образование. Тој информирал за изработката на Водич за примена на вештачка интелигенција во образованието, кој е достапен за наставниците, учениците и пошироката јавност. Воедно, нагласил и дека се реализираат обуки за наставници и ученици, како и напредни програми за примена на вештачката интелигенција во наставата, а се зајакнува и соработката со приватниот сектор.
– Демири ја потенцираше потребата од воспоставување силна регулаторна рамка што ќе обезбеди безбедна, транспарентна и етичка употреба на вештачката интелигенција, со цел еднаков пристап за сите и унапредување на општеството во целина – се посочува во соопштението.
Се очекува на крајот од седницата пратениците да ги усвојат предложените извештај и резолуција. Предвидена е и посета на Центарот за инкубација и иновации за образовни технологии (ETKIM), кој е основан од Генералниот директорат за иновации и образовни технологии на Министерството за образование и има за цел да го зајакне системот на образовни технологии преку обединување на претприемачите, истражувачите, едукаторите, студентите и организациите за поддршка.
