Македонското еколошко друштво во соработка со Планинарскиот клуб „Љуботен“ од Тетово денеска го организира шестиот Меморијален марш „До Китка во сеќавање на Љупчо Меловски“.
Искачувањето кон врвот Китка претставува средно тешка планинарска тура која почнува во 7.30 часот од селото Горно Количани, општина Студеничани, на надморска височина од 750 метри. Околу 9.30 часот се очекува групата да пристигне кај спомен-плочата посветена на проф. д-р Меловски, по што се продолжува низ шумски појас до планинарскиот дом „Китка“. Пристигнувањето на врвот Китка, на 1568 метри надморска височина, е планирано за 11.30 часот.
– Со оглед на тоа што станува збор за патека долга 18 км, при што во еден правец се искачуваат околу 700 метри во период од 4 часа, сите учесници треба да бидат во добра здравствена и психофизичка кондиција и да имаат соодветна планинарска опрема за пролетни услови. Исхраната е во сопствена режија, индивидуално предвидена за планинарска тура до 8 часа. Македонското еколошко друштво и Планинарскиот клуб „Љуботен“ не одговараат за последиците кои би се случиле надвор од оваа програма, велат организаторите.
Меловски беше научник, професор и вљубеник во планините. Тој беше и долгогодишен претседател на Македонското еколошко друштво и активен член и поддржувач на ПК „Љуботен“.
