Во Ресен денеска ќе се одржи панел-дискусија „За почиста Преспа: заеднички чекори за подобро управување со отпад“. Отворени ќе бидат прашањата – што се презема во моментов и кои се главните предизвици кога станува збор за собирањето, селекцијата и одлагањето на отпадот, зашто тоа директно влијае врз природните ресурси, здравјето, одржливиот развој и иднината на регионот.
На панел-дискусијата излагања ќе имаат Емил Стојанов од Салар Интернационал (SALAR International), Зоран Трајчевски од Програмата за развој на Обединетите нации (УНДП), Марчел Консентино Русу од ЈКП „Пролетер“ – Ресен и Ајман Ал Малла, раководител на сектор за животна средина во Општина Ресен.
Тие ќе се осврнат на регионалниот и локалниот пристап кон управувањето со отпад, на досегашните активности и искуства од терен, како и на можностите за поефикасна координација и заедничко дејствување меѓу институциите, јавните претпријатија, граѓанскиот сектор, бизнис-заедницата и локалното население.
Панел-дискусијата се организира во рамки на кампањата „Преспа? Разбуди се за чиста средина“ што ја спроведува Институтот за комуникациски студии во соработка со Еко герила Преспа и Македонското еколошко друштво, со поддршка на Европската Унија преку програмата „ЕУ за Преспа“.
