Градоначалникот на Општина Струга, Менди Ќура, оствари средба со амбасадорот на Италија во Македонија, Паоло Палминтери.
На средбата, како што соопшти денеска општинската прес-служба, била истакната важноста на Струга како еден од најубавите и најпрепознатливи делови на државата, како и традиционално блиските врски со Италија, особено имајќи ја предвид бројната струшка заедница која живее и работи таму.
Амбасадорот Палминтери, наведува Општина Струга, ја изразил, својата подготвеност за унапредување на економската соработка и зголемување на италијанските инвестиции во Струга, како и за развој на културната соработка преку различни иницијативи и програми.
– Посебен акцент беше ставен на можностите за интензивирање на културната размена, имајќи предвид претходните успешни соработки со други градови во државата, како и потенцијалот Струга да стане дел од овие иницијативи, стои во соопштението на Општина Струга.
Градоначалникот Ќура нагласил дека Општина Струга останува отворена за соработка што ќе придонесе за економски и културен развој на градот.
