Бојан Стојаноски, пратеник од редовите на ВМРО-ДПМНЕ во Собранието на гостување на една од националните телевизии, кажа дека попладнево пратеничката група на ВМРО-ДПМНЕ поднесе предлог на Законот за изменување и дополнување на Законот за пратеници, каде се предвидува еден дополнителен услов, односно, пратеник во Собранието да може да стане само лице кое има само македонско државјанство, се вели во соопштението на ВМРО-ДПМНЕ.
Тој вели дека јавноста во изминатиов период е сведок на продукција на лаги од страна на СДСM, и потсети на вчерашното соопштение на фејсбук страната на СДСM во прашална форма, во однос на тоа дали дел од пратениците гласале на изборите во соседна земја. Стојаноски демантираше дека некој од нив поседува друго државјанство освен македонско, и ги повика опозиционерите од СДСM да излезат на прес-конференција со истото, а не од собраниска говорница.
,,Во текот на вчерашниот ден, излезе една вест на фејсбук страната на СДСM во којашто сме ние неколкумина, со една прашална форма дали сме гласале на изборите во Бугарија“, рече Стојаноски.
Стојаноски вели дека тоа е стара вест, која била актуелна пред 5 години, каде тогашен министер за одбрана, а сегашен поранешен политичар во Бугарија, како што вели, сакајќи да создаде тема во јавноста ги наброил неколкумина, а тогаш имало и демант од нивна страна.
,,Јас лично не демантирав, затоа што сметав дека не треба да се даде внимание на оваа тема, но со колегите разговаравме и одлучивме да ја пресретнеме оваа лага и уште еднаш да покажеме пред јавноста со што се служи СДСM и на кое ниво е падната таа политичка партија. Затоа го поднесовме овој закон со идентичен текст како пред 5 години, тогаш коалицијата СДСM и ДУИ не го поддржа“, вели Стојаноски.
Тој кажа дека утре има пленарна седница, каде ќе побараат законот да се стави на дневен ред, и СДСM да се изјасни дали сега го поддржува како опозиција или тогаш како власт не го поддржуваше. Стојаноски напомена дека токму оние кои беа неведени во вчерашното соопштение на СДС го поднеле овој закон, а ја искористи приликата да демантира.
,,Уште еднаш да демантирам, дека никој од нас не поседува никакво друго државјанство, а најмалку бугарско“, потенцираше Стојаноски и додаде:
,,Ако се уверени во ова има начин тоа како да го докажат, нека се обратат до одредени институции, некој од нив нека нека излезе, ама да не биде од собраниска говорница, нека даде прес-конференција, секако дека ќе го тужиме“, истакна Стојаноски.
Тој дополни дека станува збор за партија која ги губи судските спорови, но вели и декка повторно ќе најдат начин како ова да го заобиколат.
„Ете ние сме потпишани на овој закон, утре ќе можат да се изјснат дали го поддржуваат или не. Ако го изгласаат, ако се тие во право ние петмина повеќе нема да бидеме пратеници, но јас мислам дека и овој пат или ќе најдат некаков начин ова да го заобиколат или повторно ќе треба да ги слушаат оние кои што и во минатиот период ги слушаа, а тоа е ДУИ“, заклучи Стојаноски.
