По повод 15 април, Светскиот ден на уметноста, Општина Пустец, со посебна почит се потсети на неуморните уметници кои оставиле неизбришлива трага во негувањето на македонскиот идентитет и култура.
-Годинашното мото „Негување на заедницата преку уметноста“, нè потсетува дека уметноста не е само творење, туку мост што ги поврзува луѓето, генерациите и нашиот заеднички македонски идентитет. На овој посебен ден, со длабока почит се сеќаваме на уметниците од Преспа кои, преку својот талент и страст, ги изградија темелите на оваа силна врска меѓу уметноста и заедницата, стои во објавата на Општина Пустец.
Се додава дека звуците на гајдата од Теодор Вангеловски, Вангел Чале и Наум Дамо ги исполнуваа срцата на луѓето и ја обединуваа заедницата во празници и радост.
Кларинетот на Ристо Ставре, еден од првите во 50-тите години, продолжен од Живко Ставре и Тако Каче, ѝ даде нова димензија на нашата народна музика.
Играорците, како Панделина Камбо (Вурмо), Менка Науми (Терпо), Сабрија Аго, Јован и Стефан Стојани, Живко Сотировски, Тако Шкемби, Елена Јовче и Елена Јоно го донесоа на сцената живиот дух на нашата традиција. Тие не беа само уметници, тие беа мостови што ги поврзуваа луѓето меѓу себе и со нивните корени.
Денес, овој дух продолжува да живее преку Фолклорната група „Преспа“, која ја чува нашата македонска традиција и достоинствено ја пренесува на младите генерации.
