Со швајцарски искуства и знаења, до поголема трговска размена, нови инвестиции и поуспешна економија. Македонија и Швајцарија отвораат нова страница во економската соработка преку Швајцарско-македонската стопанска комора која треба да биде мост за подобрување на досега скромните резултати. Клучниот предизвик е да се подобри трговската размена, но и да се искористат сите потенцијали пред се за раст на трговијата која изнесува само 1% од вкупната терговија на Македонија со странство.
„Во тој контекст, nearshoring-от се наметнува како стратешка можност. За Македонија тоа значи потенцијал за привлекување нови инвестиции, создавање квалитетни работни места и забрзување на технолошки развој. За Швајцарија, тоа значи диверзификација, и зајакнување на партнерства во регион кој е сè поважен за економската иднина на Европа“, изјави Соња Стефановска, претседателка на Швајцарско-македонската.
Швајцарскиот амбасдор во земјава, Кристоф Зомер, како предност, меѓу другото ја гледа големата македонска дијаспора во Швајцарија.
„Швајцарските компании ги ценат сигурните партнерства, пристап до пазари и квалификувана работна сила. Северна Македонија ги нуди токму овие услови: талентирани луѓе, силен претприемачки дух и стратешка локација во регионот.Со зајакнување на нашата економска соработка, можеме да создадеме нови можности за швајцарските бизниси, истовремено поддржувајќи одржлив раст и иновации овде во Северна Македонија“, рече Зомер.
Заменик министерот за надворешни работи Зоран Димитровски, очекува преку комората да се зголеми соработката меѓу двете земји.
„Нашата надеж е дека оваа стопанска комора ќе придонесе и за зголемување и на швајцарските инвестиции во Македонија, нешто е што е надлежност на министерството за надворешни работи и надворешна трговија. Навистина Владата е посветена на привлекување на странски инвестиции, но исто така и на промоција на македонскиот извоз“, рече Димитровски.
Швајцарско македонската стопанска комора се подготвувала три години, а од денес е официјален мост меѓу швајцарскиот и македонскиот бизнис.
