Градежните машини почнаа со регулацијата на реката Брегалница во атарот на село Долни Балван, Општина Карбинци. Градоначалникот на Општина Карбинци, Виктор Паунов денеска изјави дека регулацијата на реката Брегалница ќе биде со каскадно уредување и тоа на потегот од над и под мостот по течението на реката Брегалница.
-Ова е важно, заради целта која треба да ја постигнеме, а тоа е стабилизирање на речното корито не само на овој потег, туки и по самото течение на река Брегалница, а пред се за да го стабилизираме местото, кое во минатото предизвика и реконструкција на самиот мост на река Брегалница, којшто и тоа како е важен за овој дел на населението и на Општина Карбинци. Сите гравитираме токму преку овој мост кон регионалниот пат Штип-Плачковица и кон магистралниот пат кон Кочани и Република Бугарија, вели Паунов.
Во текот на изминатите години земјоделците во овој атар на село Долни Балван имаа проблеми и со свлечување на нивното земјиште во коритото на река Брегалница.
Средствата за регулација на река Брегалница со каскадно уредување се обезбедени преку Министерството за животна средина и просторно планирање преку Програмата за уредување на речните корита. Вкупната финансиска конструкција изнесува 9.200.000 денари, од кои околу 720.000 денари се кофинансирање на Општина Карбинци. Проектот се очекува да заврши до крајот на годината, доколку дозволат временските услови.
