Голем пожар избувна вечерва во скопската населба Злокуќани, при што, според првичните и неофицијални информации, огнот зафатил најмалку три до четири куќи. Густиот чад и пламенот се издигнуваат високо над населбата, а шест противпожарни екипи се борат со огнената стихија.
Интервенцијата е отежната поради тесните улички во овој дел на Скопје, кои го отежнуваат пристапот на противпожарните возила до куќите зафатени од пожарот. Според информациите од Центарот за управување со кризи, пријавата за пожарот била примена во 20:02 часот преку системот Е-112. Се работи за пожар на куќа на улицата Скупи, во општина Карпош.
На терен е и екипа на итната медицинска помош, но засега нема информации за евентуално повредени граѓани. Поради сериозноста на ситуацијата, по барање на МВР преку Дежурниот оперативен центар на ЦУК, побарано е исклучување на електричната енергија во нисконапонската мрежа за да се овозможи безбедно гаснење на пожарот.
Екипите на Бригадата за противпожарна заштита се на лице место и интензивно работат на негово локализирање. Ситуацијата е сè уште динамична и се очекуваат повеќе информации во текот на вечерта.
