Новата влада на „Студентската листа“ во првите 30 дена најавува стабилен курс на динарот, навремени плати и пензии, како и сигурно снабдување со енергенси.
Во фокусот се и клучните разговори со САД за санкциите кон нафтената индустрија на Србија и со Русија за снабдувањето со гас, изјави за неделникот „НИН“ академик Радомир Саичиќ, член на Српската академија на науките и уметностите и претставник на „Студентската листа“.
Наведувајќи ги приоритетите, Саичиќ најави донесување на буџетот за 2027 година, ревизија на големите јавни проекти и нивно обелоденување во првите 100 дена. Исто така, најавени се длабоки реформи и професионализација на државните институции преку јавни конкурси, построг надзор против корупцијата и враќање на незаконски стекнатиот имот.
Посебен акцент е ставен на ефикасна истрага и утврдување одговорност за трагедијата во Нови Сад, како и на долгорочен развој на економијата, заснована на знаење, со помош на експерти од дијаспората.
Саичиќ изјави дека составот на новата влада веќе се разгледува и таа ќе понуди опсежна програма од над 1.200 страници, со цел целосно обновување на институциите и владеење на правото.
