Жените и девојките Ромки да се школуваат, бидејќи образованието е основата за нивното активно вклучување во општеството, порачуваат од Ромската асоцијација „Родопа“. Дел од нив, поради ниското ниво на образование, недоволно ги познаваат своите права и не знаат каде да пријават доколку се жртви на семејно насилство.
„До сите жени Ромки апелирам да се охрабрат, да пријавуваат, да се образуваат, да станат дел од општеството, да се вработат, да се вклучат на пазарот на трудот и секогаш да бидат економски независни“, изјави Сабина Асанова, претседателка на Ромската асоцијација „Родопа“.
Подигањето на свеста, но и препознавањето на различни форми на дискриминација и насилство, се првите чекори кон нивното спречување. Според психолозите, од голема важност е поддршката од институциите, но и од заедницата…
„Сметаме дека, пред сè, подигањето на свесноста е прв важен чекор во тоа да се спречи и да се реагира во случај на семејно насилство, но исто така е важно да ја понудиме сите, секој на свој начин, како што можеме, институционална и вонинституционална поддршка за жртвите на насилство“, изјави психологот Весна Трајковска.
Според извештајот на Комисијата за спречување и заштита од дискриминација за периодот од 2022 до 2024 година, само 8% од жените Ромки се вработени.
