Во тек се активности и законски измени за вмрежувањето на приватните здравствени установи (ПЗУ) во јавниот здравствен систем. Ова денеска го изјави Министерот за здравство Сашо Клековски, кој рече дека паралелно функционираат три евиденции – едната е таму каде има договори со Фондот за здравствено осигурување, тоа се јавни и приватни здравствени установи, втората е приватни здравствени установи кои немаат договори со Фондот и третата се систематските прегледи, кои се едни од најмасовните здравствени прегледи, кои многу често исто не се внесуваат во здравственото досие на пациентот.
Тој посочи дека законот за медицинска евиденција е меѓу приоритетните и таму планираат да предвидат и казни, и додаде дека разговараат дали да има и одредена награда за тие приватни здравствени установи што ќе се вклучат во системот.
– Инаку тоа и поголемите здравствени установи го бараат, бидејќи тие сакаат да имаат пристап до единствената историја на пациентите. Секој лекар, без оглед дали е во јавно здравство или во приватно здравство, сака да ја види целата слика, а не само исечоци од здравственото досие. Се надевам дека измените на Законот за здравствена заштита, новиот Закон за лекови и Законот за медицинска евиденција кои се три приоритети од 12-те закони кои започнаа да се работат минатата година, наскоро ќе бидат во владина процедура, рече Клековски одговорајќи на новинарско прашање пред почетоток на одбележувањето на Светскиот ден на мозочнмиот удар .
