Насловен „8 секунди“ е мултимедијален проект на Елена Бојаџиева Цветковска што ја истражува врската меѓу краткотрајната човечка радост и долготрајните последици врз животната средина. Мултимедијалната изложба што ќе бидфе отворена вечер во 19 часот во Лабораториум во Скопје, ја сочинуваат фотографии од напуштените балони кои се придружени со две видеа по 8 секунди создадени со вештачка интелигенција – првото отсликувајќи го минатото на балоните додека второто отвора можни сценарија за нивната иднина.
-На почетокот ги „ловев“ балоните како локална појава. Со текот на времето, оваа визуелна приказна прерасна во регионална и меѓународна, откривајќи колку слични траги оставаме зад себе, независно од местото каде се наоѓаме.
Балоните многу често се инспирација и во уметноста од Банкси и Кусама до белите инсталации на Charles Pétillon. Но што се случува кога ќе исчезне визуелната возбуда? Радоста поминува, а материјалот продолжува да постои како отпад. Прославата продолжува понатаму. И балоните – исто така, вели авторката.
Таа додава дека балоните се вбројуваат во топ 3 најштетни видови отпад за морскиот свет. Истражувањата, посочува, покажале дека нивното присуство е 32 пати поверојатно да предизвика смрт кај морските птици отколку голтањето тврда пластика – потсетник дека еден навидум нежен предмет кој е симбол за среќа може да остави тешки последици.
-Намерата не ми е да ја одземам радоста од балонот, туку да отворам простор за преиспитување. Дали сме посреќни со 101 балон отколку со еден? Како ги избираме декорациите и што правиме со нив потоа? Можеме ли преку повторна употреба да му дадеме нов живот на моментот? Ова се прашања на кои се надевам дека ќе најдеме одговори – за радоста да остане. Благодарност до мојот ментор Andrew Hiiling како и до Magda Petford и Natalia Eernstman
за нивната посветеност, поддршка и водење низ целиот процес, наведува Бојаџиева Цветковска.
Проектот е поддржан од Британскиот совет и Black Mountains College преку програмата „Climate Adaptation for Creatives“.
Сите фотографии се спонтано доловени и нережирани. Видеата создадени со вештачка интелигенција прикажуваат замислени сценарија чија цел е да ја подигнат свесноста за проблемот со кој сме опкружени, наведува авторката Елена Бојаџиева Цветковска.
