Украина ќе увезува гас од Грција за да ги задоволи потребите на земјата во текот на зимата, изјави претседателот Володимир Зеленски. Тој денеска престојува во Атина на средби со политичкиот врв на Грција. Посетата на Зеленски на Атина, поради безбедносни причини, официјално беше соопштена изутрината.
„Веќе подготвивме договор со Грција за гас за Украина, што ќе биде уште еден пат за снабдување, за да се обезбеди увоз за зимата, колку што е можно повеќе. Веќе имаме договори за финансирање на увозот на гас и ќе покриеме речиси 2 милијарди евра потребни за увоз на гас, за да се компензираат загубите во украинското производство предизвикани од руските напади“ – објави Зеленски на Телеграм.
Од Грција, Зеленски треба да отпатува во Франција и Шпанија. Грчката полиција соопшти дека поради посетата на претседателот на Украина се забранети собири и протести во центарот на градот од 6 часот утрото до 22 часот.
