Заврши изградбата на канализациската мрежа на дел од улицата „Петрашевска“ и дел од улицата „Чифличка“ во населбата Стрелиште во Делчево, со што е реализирана првата фаза од проектот за унапредување на комуналната и уличната инфраструктура во овој дел од градот.
Во следната фаза од проектот е предвидена изградба на двете улици, и тоа на улицата „Петрашевска“ во должина од 320 метри и на улицата „Чифличка“ во должина од 100 метри.
Со завршувањето на канализациската мрежа најнапред се создадени услови за целосно уредување на подземната инфраструктура, по што ќе следува изградбата на улиците, со што ќе се подобрат пристапноста и условите за движење на жителите.
Проектот се реализира со средства од буџетот на Општина Делчево и е дел од активностите за континуирано подобрување на комуналната инфраструктура и квалитетот на живот во населените места.
Од Општина Делчево посочуваат дека продолжуваат со реализација на инфраструктурни инвестиции насочени кон решавање на потребите на граѓаните и создавање подобри услови за живот во сите делови на градот.
