Да не се шират лажни информации за реновираниот студенски дом „Стив Наумов“. Делегацијата на ЕУ во Македонија, реагира по обвинувањата на опозициската СДСМ и објавите на социјалните мрежи за лоши услови за престој на студентите во овој дом. По директниот увид од страна на министерката Јаневска, проверка на условите во „Стив Наумов“ направија и претставници од Брисел. Со оглед на тоа што домот е реновиран од австриска компанија во соработка со Европската Унија, се потсетува дека објектот е се уште во гарантен рок. Од Делагцијата порачуваат – фотографии или изолирани инциденти не секогаш ја прикажуваат целосната слика, па затоа заклучоците треба да се засноваат на утврдени факти.
„Доколку се утврдат какви било градежни недостатоци или технички проблеми, тие треба да се пријават преку соодветните канали, по што ќе бидат разгледани и отстранети од страна на одговорните изведувачи на работата.Решавањето на реални проблеми и презентирање точни информации се од суштинско значење за заштита на интересите на студентите и за одржување на јавната доверба. Студентите имаат полно право да изразат загриженост, и тоа треба да се сфати сериозно. Подеднакво важно е да се осигури дека информациите што се споделуваат во јавноста се точни и соодветно проверени.“ – се вели во соопштението на Европската Унија.
Претходно и Министерката Јаневска направи увид во реновираните простории и апелираше до семјствата на студентите да не подлегнуваат на политички дезинформации. И таа посочи дека е можно да се појават поединечни проблеми, но нагласи дека објектот е под гаранција и сите евентуални дефекти ќе бидат отстранети.
Студентскиот дом официјално ги отвори вратите во септември оваа година по неговата темелна реконструкција .Надлежните најавија дека ќе се реконструираат вкупно 9 студентски домови низ државава. Тоа е и дел од владината стратегија за младите да останат тука и да учат во сопствена земја.
