Најдоцна до септември, штипската Клиничка болница ќе добие регионален Ургентен центар, кој ќе им пружа итна медицинска помош на пациентите со животозагрозувачки состојби од Источниот и Југоисточниот Регион. Постапката за негово формирање веќе е започната, а во наредниот период ќе се преадаптираат просториите на сегашната дежурна амбуланта. Ургентниот центар ќе работи 24 часа дневно, седум дена во неделата и ќе ги покрива сите итни состојби кај децата и возрасните пациенти.
„Ќе биде хируршки и интернистички ургентен центар за сите пациенти од Источниот и Југоисточниот Регион кои ќе доаѓаат како ургентни случаи. Овде првично ќе бидат згрижени за дијагностицирање, а потоа ќе бидат третирани на соодветните оддели каде што е потребно“, изјави д-р Билјана Ефтимова, заменик-директор на Клиничката болница во Штип.
Идејата за негово формирање постои веќе неколку години, но реализацијата се одложуваше поради недостиг на медицински кадар и соодветни простории. Со пренамената на модуларната болница во амбуланти за пациентите кои се упатуваат преку системот „Мој термин“, конечно се создадоа услови за реализација на овој проект.
„Модуларната болница веќе функционира за пациентите преку „Мој термин“, така што напливот на пациенти на приемното одделение е значително намален. Амбулантите за ендокринологија и за подигнување инсулин веќе се префрлени во модуларната болница. Физичката подготовка е направена и сега има услови за формирање на Ургентниот центар“, изјави д-р Владко Захариев, директор на Клиничката болница во Штип.
Низ годините, штипската Клиничка болница се соочуваше со сериозен недостиг од лекари специјалисти, медицински сестри и технички персонал, што беше една од главните пречки за формирање Ургентен центар. За да се намали недостигот од медицински кадар, минатиот месец беа распишани огласи за вработување на 25 лица.
