Министерот за економија Бесар Дурмиши во „5 до 12“ се предомислил да не и предложи на Владата да ги замрзне цените на производите. Задоволен е што трговците по искажаните опомени, се опаметиле и ги корегирале цените надолу. Дециден е дека нема да се дозволи раст на цените на најосновните производи за време на празниците. Листата била дополнета со 50 нови продукти. Дел од маркетите веќе објавиле флаери со пониски цени на јајцата, маслото за јадење, месото и сувомеснатите производи, млекото, путерот, јајцата. Дурмиши предупредува, ако трговците повторно станат алчни и ги подигнат цените нагоре, веднаш ќе реагира и ќе ја активира мерката замрзнување на цени.
За поскапувањето на производите кои не се дел од новогодишната кошничка, Дурмиши вели дека инспекторите на терен утврдиле дека нема простор за пишување казни. Немало пораст на нивниот профит.
Премиерот Мицкоски вели дека по опомените и најавите за ограничување на маржите и замрзнување на цените, трговците ги вратиле цените на старите пониски нивоа. Најголем дел од трговците го почитувале договореното. И според него, засега немало потреба Владата да ги ограничи цените.
На листата на новогодишната кошничка се наоѓаат над 1000 производи. Мерката трае до 15-ти јануари. Целта на оваа акција беше граѓаните да пазарат во екот на новогодишните и божикните празници по најниски цени на производите кои најчесто се купуваат во овој период од годината.
