„Кирил Донски-витезот на Македонија“ е насловот на документарниот филм, кој вечерва во 19 часот, во малата сала на Центарот за култура „Ацо Шопов“ во Штип ќе биде премиерно прикажан пред штипската публика. Документарниот филм е во режија и по сценарио на Александар Донски и Виктор Донски.
Историчарот Александар Донски денеска информираше дека преку архивски материјали, сведоштва и значајни моменти од животот на Кирил Донски, публиката ќе има можност да ја проследи неговата богата кариера. Станува збор за личност која оставила длабока трага во македонското општество и еден од најзаслужните граѓани во областа на пронајдоци и иновации. Донски бил партизан, борец, а својата работна кариера Кирил Донски ја завршил во 1987 година како универзитетски професор на Економскиот факултет во Штип. Највисокото признание за својата повеќе децениска творечка дејност Донски го добива во 1999, добивајки орден за заслуга од областа на пронаоѓаштвото и е прогласен за Витез на пронаоѓаштвото.
