Од рано утрово, во битолската Алта банка, без никакви проблеми и без гужви, тече исплатата на парите и за корисниците на социјална помош. Парите во висина од 20.000 денари граѓаните ги добиваат за многу кратко време на сите банкарски шалтери, кои од вчера работат во две смени. Најголемиот дел биле известени преку СМС-пораки, но се услужуваат и оние граѓани кои не добиле порака или не ги знаат ПИН-кодовите од картичките. Според податоците, над 5.500 граѓани треба да бидат исплатени по овој основ.
Инаку, како што веќе е познато, од вчера започна исплатата за пензионерите, чиј вкупен број, односно бројот на клиенти на оваа банка, изнесува околу 3.500. Шалтерите работеа во две смени, а истиот принцип продолжува и денеска и утре. Од наредната недела се очекува парите да се исплаќаат и во експозитурите на банката во другите градови во земјава каде што ги има.
Вчера, од Алта банка 556 пензионери успешно ги подигнале своите пари, иако првичниот план бил да бидат услужени околу 400 лица.
Во меѓувреме, Народната банка бара решенија за непречена исплата и на налозите од фирмите кои соработуваат со Алта банка, и тоа во најкраток рок, за да се запази законската рамка за исплата на плати и други плаќања до 15-ти во месецов.
