Владата со нови мерки ќе го спречува иселувањето на младите. Заменик министерот за економија Марјан Ристески, најави дека од следната година ќе се зголеми буџетот за вработување млади. Преку Агенцијата за вработување ќе се креираат нови мерки за да се привлечат Македонците што студираат во странство да се вратат и да работат во земјава или пак да отворат свои бизниси овде. Ристески вели дека приоритет на Владата е да се задржат младите во Македонија и да се вратат дел од иселениците. Приоритетите на Владата се отворање на нови 70 илјади работни места во наредните четири години за млади луѓе, 500 загарантирани работни места за најдобрите студенти од универзитетите во Македонија, како и нови даночни олеснувања на фирмите и компаниите во Македонија за вработување на млади.
Голем дел од мерките кои сега се спроведуваат од Министерството за економија и Агенцијата за вработување не даваат ефекти – вели Ристески. Од Друштвото на словенечки и македонски стопанственици велат дека е многу важно како овие мерки ќе се креираат за да има резултати. Во светот ваквите даночни олеснувања за вработување млади биле успешни.
Во моментов 1700 Македонци студираат во Словенија. Бројката е уште поголема бидејќи многумина студираат со европски пасоши. Од студентското здружение во Словенија порачуваат дека треба поголема кооперација меѓу студентите во Словенија и бизнисите во Македонија за овие луѓе да сакаат да се вратат во родната земја.
Новите мерки за вработување млади ќе бидат дискутирани следната недела во Министерството за економија со сите засегнати страни.
