Уништени смарт табли, компјутери, намерно поплавување и испишани непристојни содржини по ѕидовите. Вака утрово изгледа најголемото основно училиште во Штип, „Ванчо Прќе“, по невидениот вандалски чин што се случил во текот на ноќта. Маскирано лице влегло околу полноќ и уништило сè што му дошло при рака.
Најголема штета е направена на вториот и третиот кат, односно во кабинетите по предметна настава, додека приземјето е речиси неоштетено. Освен уништувањето на инвентарот, сторителот покажал и дополнителна дрскост – затнувал дел од мијалниците и ја оставил водата да тече. Поради ова, денеска е откажана наставата за над 1.100 основци.
„Штетата е нанесена во делот од предметна настава, во поголем дел од кабинетите. Штетата е материјална. Проценката и увидот се во тек. Нанесени се содржини со спреј по ѕидовите, смарт таблите, на таблите по училниците. Се работи за голема материјална штета. Проценката не можам да ви ја кажам во овој момент“, изјави директорот на ООУ „Ванчо Прќе“, Кокан Радев.
Вандалот единствено не успеал да влезе во кабинетот по хемија, бидејќи бил заклучен. Од снимките од безбедносните камери на училиштето се утврдило дека тој влегол преку делот на фискултурната сала, по што се движел низ просториите каде што се одвива наставата.
„Една камера е испрскана со спреј. Но и самата таа камера, додека трае тоа покривање на камерата со спреј, го снима. Во неколку пати се обидува, таа е високо поставена за да конечно успее“, изјави директорот на ООУ „Ванчо Прќе“ – Штип.
Во тек е увид од страна на надлежните служби. Од училиштето очекуваат во наредните денови да се санираат штетите, со што наставата би продолжила во понеделник.
