Учениците од деветто одделение при ООУ „Стив Наумов“ – Скопје денеска го посетија Основниот кривичен суд Скопје, каде што преку едукативна и интерактивна средба имаа можност непосредно да се запознаат со функционирањето на правосудниот систем, како и со предизвиците поврзани со малолетничката деликвенција и нејзината превенција – соопштуваат од судот.
Во рамките на посетата учениците биле информирани за постапките што се водат кога во нив се инволвирани малолетни лица, за законските мерки и санкции што се изрекуваат, како и за процесот на ресоцијализација и повторно вклучување на младите во општеството. Посебен акцент бил ставен на превенцијата од девијантни и деликвентни однесувања, улогата на семејството и образованието, како и значењето на навремената институционална поддршка.
– Учениците имаа можност да се запознаат и со просторните и техничките услови за работа во судот, организацијата и функционирањето на судската служба, како и со безбедносните протоколи што ги спроведува судската полиција. Во текот на посетата тие разговараа со в.д. претседателката на судот, со судии, како и со пробациски службеници, кои преку конкретни примери од правосилно завршени предмети им ги доближија последиците од однесувања што може да доведат до кривична или прекршочна одговорност – стои во соопштението од Кривичен.
Преку отворен дијалог и едукативен пристап учениците добиле подетален увид во улогата на судот во заштитата на правата на малолетниците, но и во механизмите што институциите ги применуваат за нивна ресоцијализација, поддршка и насочување кон правилен личен и општествен развој.
– Воедно, Основниот кривичен суд Скопје ги охрабри учениците своето слободно време по завршувањето на учебната година да го искористат за волонтерски активности и практична настава во судот во рамките на проектот „Учиме преку познат работодавач“. Целта на проектот е младите одблиску да се запознаат со правосудниот систем и правната професија, како и да стекнат практични знаења доколку во иднина одлучат своето образование и професионален развој да ги насочат во областа на правото – дополнуваат од таму.
