🎥 Трипуновски: Со кампања „Македонско најдобро“ до поголемо домашно производство

Со кампањата „Македонско најдобро – нашата традиција,  наша гордост“ до поголема промоција на домашното земјоделско производство. Министерот за земјоделство Цветан Трипуновски е оптимист дека со обележувањето на македонското овошје, зеленчук, јајца и конзервирани прехранбени производи во маркетите ќе се стабилизираат цените и ќе се зголеми производството на храна. Во моментов течат последните логистички подготовки пред маркетите и продавниците да ги обележат производите.

Бизнисмените ја поздравуваат идејата и активно ќе учествуваат, но засега прават само анализи околу евентуалното намалување на цените на производите.

Министерството за земјоделство е активно вклучено во анализата за креирање мерки во борба со растечката инфлација. Трипуновски вели дека преку исплата на субвенции и финансиска помош, интензивно се работи на зголемување на домашното земјоделско производство. Првите ефекти веќе биле видливи – зголемените се количините на пченица со што се задоволуваат домашните потреби.

Инаку, премиерот во неколку наврати напомена дека инфлацијата во јули растела поради поскапување на услугите во транспортот и угостителството, а помалку поради храната. За еден месец цените на храната се зголемиле за само 0,3%, додека во јули храната и безалкохолните пијалоци биле поскапи за 6,8% споредено со истиот месец лани.